என் கைக்கடிகாரம்

துடிப்புதான் வாழ்க்கையென்று
சொல்லிக்கொண்டிருக்கிறது
மனம் அறியும்
மௌன மொழியால்

அல்லி மலரும் நேரமென்றும்
வெள்ளி முளைக்கும் நேரமென்றும்
விண் விழிக்கும் நேரமென்றும்எ
த்தனை எத்தனையோ பிரிவுகள்
இருந்தும் எதுவும் அறியாமல்
இயக்கம் மட்டும் வட்டப்பாதையில்

ஆளப்பிறந்த அலெக்ஸாண்டர்
அவதிப்பட்ட இயேசு கிறிஸ்து
அகிம்சை என்று
சொல்லித்திரிந்த காந்தி-வெள்ளை
ஆணவம் அழித்திட்ட சுபாஷ்
எத்தனை எத்தனை தலைவர்கள்
எவ்வளவு சாதனைகள் அதிலும்
இழைக்கப்பட்ட வேதனைகள்
காலமெனும் பெயரில் அது
காத்து வரும் வரலாறுகள்தானே இவை

பொறுமை கற்றுத்தர சின்னமுள்
போதிய திட்டமிடலுக்கு பெரியமுள்
செயல்பாட்டின் வேகத்திற்கு நொடிமுள்
எத்தனை பெரிய செய்தியை
எவ்வளவு அடக்கமாக கூறுகிறது

எத்தகைய நிகழ்வுகள் இருந்தாலும்
என் கைக்கடிகாரம் துடிப்பதென்னவோ
அவளின் நினைவுகளை சுமந்துகொண்டுதான்!